Dokumenti i BE-së, në të cilin këshillohej të mos përdoren urime, ku thuhej fjala “Krishtlindje”, por fraza më të përgjithshme, si “Gëzuar festat”, “është anakronist”. Kështu pohoi Papa Françesku, gjatë bisedës tradicionale me gazetarët, në avionin e kthimit nga Greqia për në Vatikan.
“Gjatë historisë – vërejti Ati i Shenjtë Bergoglio – shumë diktatura u përpoqën t’i bëjnë këto gjëra, mendoj për shembull, për Napoleonin, ose për diktaturën naziste e për atë komuniste”. “Sot është modë, është laicizëm i zbehtë, ujë i distiluar. Por nuk funksionoi gjatë historisë”, nënvizoi Françesku, duke kritikuar edhe kolonizimet ideologjike, të cilat BE-ja nuk duhet t’i ndjekë e as të bëhet bartëse e tyre.
