Ishte vetë kreu i Dikasterit për Klerin, Kardinali Lazzaro You Heung-sik, ai që priti anëtarët e Konferencës Ipeshkvnore të Shqipërisë në ambientet e këtij institucioni, kaq të rëndësishëm për mbarëvajtjen e jetës dhe misionit të Kishës.
Në një klimë mjaft të ngrohtë dhe vëllazërore, i shoqëruar nga numri dy i këtij institucioni, Arqipeshkvi Carlo Maria Radaelli, Kardinali dëgjoi me shumë kujdes dhe vëmendje raportimin e udhëheqësve të Kishës sonë lokale mbi sfidat dhe misionin e klerit katolik në Shqipëri.
Imzot Giovanni Peragine, Arqipeshkëv Metropolit i Shkodër-Pultit, në emër të Konferencës, bëri një paraqitje të përgjithshme mbi gjendjen aktuale të dioqezave dhe të urdhrave rregulltarë që punojnë dhe veprojnë në vendin tonë.
Duke marrë shkas edhe nga vizitat e tyre personale në Shqipëri, autoritetet e Vatikanit vlerësuan lart qëndresën dhe kontributin historik që meshtarët katolikë kanë dhënë tradicionalisht në procese të shumta historike nëpër të cilat kanë kaluar vendi dhe Kisha jonë.
Dom Mark Pashkja
Zëdhënës i KISH
