Në këto momente të vështira për shëndetin e Papa Françeskut, Konferenca Ipeshkvore e Shqipërisë ka vendosur që e Enjtja, 27 shkurt 2025, të jetë një ditë e veçantë lutjeje për Atin e Shenjtë. Presidenti i KISH-it, Imzot Gjergj Meta, na fton të bashkohemi në këtë akt besimi dhe afërsie shpirtërore.
Më poshtë, letra e plotë:
Rrëshen 25 shkurt 2025
Të dashur vëllezër e motra në Krishtin,
Duke ndjekur me kujdes ecurinë e shëndetit të Papa Françeskut, i cili këto ditë ndodhet i shtruar në Spitalin “Gemelli” në Romë, në një situatë kritike për jetën, Konferenca Ipeshkvore e Shqipërisë ka vendosur që ditën e Enjte datë 27 shkurt 2025 t’ia kushtojë lutjes për shëndetin e Papa Françeskut.
T’i lutemi Hyjit për Papën që t’i qëndrojë pranë në këto momente kritike për shëndetin e tij e t’ia besojmë Nanës së Këshillit të Mirë jetën e tij me lutjen dhe afërsinë tonë shpirtërore.
Duke qenë i sigurtë se në çdo Dioqezë, famulli, shtëpi rregulltare dhe familje do t’i përgjigjeni me bujari e përshpirtëri kësaj thirrjeje, për të shprehur bashkimin tonë si Kishë më Atin e Shenjtë, ju përshëndes përzemërsisht,
Në Krishtin
+ Dom Gjergj Meta
Ipeshkëv i Rrëshenit
President i KISH-it
