Dhjetori, si muaji i festës së Krishtlindjes, ofron edhe një sërë aktivitetesh të Caritasit Dioqezan Sapë, si parapërgatitje për këtë kohë të shenjtë e të gëzueshme. Një ndër to ishte dhe Panairi i punimeve të mrekullueshme nga duart e Personave me Aftësi Ndryshe, zhvilluar nën kujdesin e veçantë të Caritasit.
Në ceremoninë e hapjes ishin të pranishëm vetë aktorët e këtij panairi, Ipeshkvi i Sapës, Imzot Simon Kulli, stafi i Caritasit, meshtarë e motra, kryetari Bashkisë Vau Dejës z. Kristjan Shkreli si dhe intelektualë të fushave të ndryshme.
Ndryshe nga herët e tjera, ky aktivitet u nderua edhe me pjesëmarrjen e Zonjës së Parë të Shqipërisë, znj. Amanda Bega, e cila e vlerësoi shumë këtë event që këto persona zhvillojnë tashmë prej vitesh në Dioqezën e Sapës.
Ky aktivitet i përvitshëm ngjalli interes të madh, përmes së cilës promovohen vlerat shpirtërore dhe sociale të këtyre personave.
Fillimisht iu uroi mirëseardhjen Drejtori i Caritasit, z. Nikolin Lekaj, i cili falenderoi të pranishmit dhe gjithë njerëzit vullnetmirë që tregojnë kujdesin dhe dashurinë humane për personat me aftësi ndryshe. Në mënyrë të veçantë ai falenderoi bariun e kësaj dioqeze, Imzot Simonin, i cili me mbështetjen e tij personale dhe institucionale është shtylla kryesore ku personat me nevoja të veçanta ndjehen të vlerësuar e të realizuar në vetvete.
Edhe vetë Imzot Simoni, gjatë fjalës së tij u shpreh: “….-vlerësoj shumë punën dhe misionin bamirës që Caritasi bashkë me ndihmën e vullnetarëve të tij, krijojnë duke mbështetur këtë shtresë që kanë nevojë për qendrën e vëmendjes. Dhe ne mundohemi që të jemi shpresë për ata që ju mungon shpresa; dashuri për ata që ju mungon dashuria; duar për ata që nuk kanë duar; këmbë për ata që nuk kanë këmbë, duke e realizuar këtë edhe me vepra. E të gjithë së bashku, vendi jonë, Shqipëria jonë duhet ta dëshmojmë përmes dashurisë dhe përkujdesjes afër atyre që kanë nevojë, dhe të shihet ngrohtësia dhe afërsia e të gjithëve ndaj më nevojtarëve që kanë nevojë për buzëqeshjen tonë“.
Po kështu edhe Kryetari i Bashkisë, z. Kristjan Shkreli, vlerësoi punën e Dioqezës së Sapës që gjithmonë gjendet pranë shtresave me nevoja të veçanta, ndërsa ofroi edhe bashkëpunimin ndërinstitucional për këtë kategori.
Në panair u shfaqën punime të ndryshme si piktura, betleheme dhe punime të tjera në tjegull dhe me qirinj, një punë kjo e demonstruar, e konkretizuar dhe përqafuar me dashuri nga personat me aftësi ndryshe.
Violeta Marashi
