Ndërmjet viteve 2005 dhe 2022, Kombet e Bashkuara kanë vërtetuar 315,000 shkelje të rënda ndaj fëmijëve në situata konflikti, duke dëshmuar ndikimin shkatërrues të luftës dhe konfliktit te fëmijët. Ndërsa shtetet, donatorët dhe komuniteti humanitar mblidhen në Norvegji për Konferencën e Oslos për Mbrojtjen e Fëmijëve në Konfliktet e Armatosura, UNICEF bëri të ditur se që nga fillimi i monitorimit në 2005, Kombet e Bashkuara kanë verifikuar 315,000 shkelje të rënda të kryera nga palët ndërluftuese në më shumë se 30 situata në Afrikë, Azi, Lindjen e Mesme dhe Amerikën Latine. Këto përfshijnë: më shumë se 120,000 fëmijë të vrarë ose të gjymtuar; të paktën 105,000 fëmijë të rekrutuar ose përdorur nga forcat e armatosura ose grupet e armatosura; më shumë se 32.500 fëmijë të rrëmbyer; më shumë se 16,000 fëmijë i nënshtrohen dhunës seksuale. Kombet e Bashkuara kanë verifikuar gjithashtu më shumë se 16,000 sulme në shkolla dhe spitale dhe më shumë se 22,000 raste të mohimit të aksesit humanitar për fëmijët.
Meqenëse këto janë vetëm rastet e vërtetuara – thuhet në një deklaratë të UNICEF-it – numri real ka të ngjarë të jetë shumë më i lartë. Përveç kësaj, shumë miliona fëmijë të tjerë janë zhvendosur nga shtëpitë dhe komunitetet e tyre, kanë humbur miqtë ose të afërmit, ose janë ndarë nga prindërit ose nga ata që kujdeseshin për ta. “Çdo luftë është në fund të fundit një luftë kundër fëmijëve”, tha Drejtoresha Ekzekutive e UNICEF-it, Catherine Russell. “Ekspozimi ndaj konfliktit ka efekte katastrofike, që ndryshojnë jetën e fëmijëve. Megjithëse dihet se si duhet vepruar për të mbrojtur fëmijët nga lufta, bota nuk po bën sa duhet”. Për këtë arsye, ndërsa liderët takohen në Oslo, UNICEF-i u bën thirrje qeverive që të marrin angazhime të reja dhe të guximshme për të “ruajtur dhe zbatuar ligjet dhe standardet ndërkombëtare tashmë në fuqi për të mbrojtur fëmijët në luftë, duke përfshirë mbrojtjen e shkollave, spitaleve dhe objekte të tjera të mbrojtura, të tilla si strukturat e ujit dhe higjieno-sanitaret, ndërprerja e rekrutimit dhe ajo e përdorimit të fëmijëve nga grupet dhe forcat e armatosura, dhe ndërprerja e përdorimit të armëve shpërthyese në zonat e populluara”. Organizmi i Kombeve të Bashkuara më pas kërkon që “përgjegjësit për shkeljet e të drejtave të fëmijëve të japin llogari” dhe “aktorët humanitarë të investojnë në politika që i vendosin fëmijët dhe mbrojtjen e tyre në qendër të veprimit humanitar në situata të konfliktit të armatosur”.
