HomeJeta e KishësPapa kujton Nënë Terezën me rastin e pesëvjetorit të shenjtërimit të saj
HomeJeta e KishësPapa kujton Nënë Terezën me rastin e pesëvjetorit të shenjtërimit të saj

Papa kujton Nënë Terezën me rastin e pesëvjetorit të shenjtërimit të saj

Pas lutjes së përjavshme “Angelus”, Papa Françesku ka bërë një përshendetje edhe për Nënë Terezën me rastin e pesëvjetorit të shenjtërimit të saj.

Në mesazhin Ati i Shenjtë përveçse përkujtoi Nënë Terezën, përshendeti edhe të gjithë Misionarët e Bamirëisë.

“Sot është kujtimi i Shën Terezës së Kalkutës, për të gjithë Nënë Terezën. Një duartrokitje e madhe! Unë i drejtoj përshëndetjen time të gjithë Misionarëve të Bamirësisë, të angazhuar në të gjithë botën në një shërbim shpesh heroik, po mendoj veçanërisht për Motrat e “Dhuratës së Marisë”, këtu në Vatikan”, kjo ishte përshendetja e Papa Françeskut.

Nuk është hera e parë që Papa Françesku e kujton Nënë Terezën.

Ndërmjet shumë rastesh, e pati kujtuar posaçërisht gjatë udhëtimit të tij të 29-të apostolik, në Shkup, kryeqyteti i Maqedonisë së Veriut, ndërsa vizitonte Shtëpinë-Memorial të Nënë Terezës.

Prej asaj shtëpie i pati drejtuar Shenjtes shqiptare të bamirësisë, lutjen, të cilën po jua e rikujtojmë në pesëvjetorin e Shenjtërimit të Nënë Terezës:

O Zot, Atë i Mëshirës dhe i çdo të mire

të falenderojmë për dhuratën e jetës

dhe të karizmës së shën Nënë Terezës.

Përmes Provanisë tënde të pamasë e thirre

të dëshmojë dashurinë hyjnore

ndër më të varfërit e Indisë e të botës.

Ajo diti të bëjë të mira për më nevojtarët,

sepse pa në çdo burrë e në çdo grua

fytyrën e Birit Tënd.

E butë dhe e përvujtë ndaj dikimit të Shpirtit Tënd,

u kthye në zë lutës i të varfërve

dhe i të gjithë atyre

që kanë uri dhe etje për drejtësi.

Duke e bërë të vetën britmën e Jezusit në kryq,

“Kam etje”,

Nënë Tereza ia shuajti

etjen Jezusit në kryq,

me vepra dashurie të mëshirshme.

Të lutemi ty, o shën Nënë Terezë,

o nëna e të varfërve,

të lutemi për ndërmjetsim të veçantë e për ndihmë,

këtu, në qytetin tënd të lindjes,

ku e kishe shtëpinë.

Këtu more dhuratën e rilindjes

në sakramentet e besimit të krishterë.

Këtu i dëgjove fjalët e para të fesë

në familje dhe në bashkësinë e besimtarëve.

Këtu fillove t’i shohësh

e t’i njohësh njerëzit nevojtarë,

të varfërit e të vegjlit.

Këtu mësove nga prindërit t’i duash

më nevojtarët e t’i ndihmosh.

Këtu, në heshtjen e kishës

dëgjove thirrjen e Jezusit për ta ndjekur

në misione si rregulltare.

E këtu po të lutemi: ndërhy pranë Krishtit

që edhe ne të marrim dhuratë hirin

për të dëgjuar me vëmendje dhe kujdes britmën e të varfërve,

të atyre, që privohen nga çdo e drejtë:

të sëmurët, të mënjanuarit, të fundmit.

Ai i Lumi na dhashtë hirin ta shohim

në sytë e atyre, që na vështrojnë

sepse kanë nevojë për ne.

Na dhashtë një zemër, që di ta dojë Zotin

e pranishëm në çdo burrë e në çdo grua,

që di ta njohë ndër ata

të cilët pësojnë vuajtje dhe padrejtësi.

Na dhashtë hirin të jemi, edhe ne,

shenjë dashurie e shprese në kohën tonë,

që ka kaq nevojtarë, kaq të braktisur,

kaq të harruar e kaq emigrantë.

Bëj që dashuria jonë të mos shprehet vetëm me fjalë,

por të jetë e frytshme dhe e vërtetë,

që të mund të japim

dëshmi të besueshme në Kishë,

e cila e ka për detyrë

t’u predikojë Ungjillin të varfërve,

çlirimin të burgosurve, gëzimin të pikëlluarve,

hirin e shëlbimit, të gjithëve.

O Shën Nënë Tereza lutu për këtë qytet,

për këtë popull, për Kishën e tij

e për të gjithë ata, që duan ta ndjekin Krishtin

si dishepuj të Atij Bariu të Mirë,

duke bërë vepra drejtësie, dashurie,

mëshire, paqeje dhe duke shërbyer,

si Ai, që erdhi jo për t’u shërbyer,

por për të shërbyer e për të dhuruar jetën për shumëkënd,

Krishti, Zoti ynë.

Amen

Na ndiqni

1,210FansLike
252FollowersFollow
126FollowersFollow

Të tjera

Të ngjashme