HomeArqidioqeza Shkodër-PultImzot Angelo Massafra lajmëron kalimin në amshim të Dom Gjergj Simonit
HomeArqidioqeza Shkodër-PultImzot Angelo Massafra lajmëron kalimin në amshim të Dom Gjergj Simonit

Imzot Angelo Massafra lajmëron kalimin në amshim të Dom Gjergj Simonit

Arqipeshkvi Angelo Massafra lajmëron kalimin në amshim të Dom Gjergj Simonit, meshtar i kësaj Arqidioqeze Shkodër-Pult, ditën e sotme, më 28 janar 2022, dhe i fton të gjithë besimtarët që të luten për shpirtin e tij të bekuar dhe të marrin pjesën në Ritin e Salikimit, që do të mbahet nesër, më 29 janar 2022, ora 11.00, pranë kishës Katedrale të Shën Shtjefnit në Shkodër.
Deri në momentin e Ritit të Varrimit trupi i Dom Gjergj Simonit do të qëndrojë për nderim në Sallën “Mikel Koliqi”, që ndodhet pranë Famullisë “Zoja e Shkodrës”.
Falënderojmë Zotin për dhuratën që i ka bërë Kishës së Hyjit që është në Shqipëri për këtë vëlla meshtar, për besnikërinë e tij, për zellin e tij meshtarak dhe për dëshminë e jetës së tij ofruar Hyjit dhe Kishës.


Curriculum vitæ e Dom Gjergj Simonit:
Dom Gjergj Simoni, ka lindur në Shkodër më 08.12.1933, në një familje qytetare shkodrane. I rritur në një mjedis katolik e me prindër të devotshëm fetarë. Që në moshë të vogël, ka pasur thirrje të brendshme për t’ju kushtuar Zotit, e cila me kalimin e viteve ka ardhur duke u shtuar pa pasur asnjë lëkundje.
Duke qenë se Kisha Katolike në Shqipëri pësoi përsekutime që në ditët e para të ardhjes së komunizmit, me mbylljen e seminarit, nxjerrjen e motrave prej kuvendeve, arrestimin e pothuajse e të gjithë meshtarëve dhe pushkatimin e shumë prej tyre, i bëri studimet për meshtar në mënyrë të fshehtë. Gjatë viteve të mëvonshme ka punuar punë të ndryshme si nëpunës, por në të shumtën e viteve si punëtor krahu deri në gushtin e vitit 1976, kur u arrestua nga forcat e Sigurimit.


Natën e Pashkëve të vitit 1977 doli në gjyq dhe u dënua me akuzën e të ashtëquajtur “agjitacion i mbyllur” dhe në pretence Prokurori e dënoi me 10 vjet burg. Arsyeja e dënimit ishte se në oborrin e shtëpisë së tij kishte groposur librat më të zgjedhur të Arqipeshkëvisë dhe objekte të Shenjta marrë fshehtas para se të mbylleshin kishat. Po ashtu, në dhe kishte futur edhe shkrimet e vëllait të tij, Imzot Zef Simoni. Githashtu ka fshehur nën dhe edhe dorëshkrimet e Padër Mark Harapi S.J., të Padër Benedikt Dema, si dhe qindra vjersha dhe poezi të shkruara gjatë viteve prej tij. Midis tyre dallohet poema satirike me titull “Letra e Luciferrit drejtuar popullit Shqiptar”, ku në fund ka vendosur shenimin: Luçiferri = Enver Hoxha.


Në vitin 1985 është liruar nga burgu, pas kalvarit që e shoqëroi në tre kampe burgu; Ballsh, Qafë e Barit dhe Spaç. Mbas muajve të lirimit ka hyrë në punë si punëtor dhe ka punuar kështu deri në muajt e para të vitit 1991. Me riardhjen e lirisë së fesë në Shqipëri, më 21 prill 1991 është shuguruar meshtar nga Imzot Nikoll Troshani. Për një vit ka shërbyer në qytetin e Shkodrës dhe është emëruar famullitar i Dajçit të Bregut të Bunës dhe administrator i famullisë së Pentarit në shtatorin e 1992. Eshtë meshtar i parë i shuguruar mbas mbylljes së kishave. Përveç shërbimeve fetare të përditshme, është marrë edhe me sistemimin vëllimeve me poezi gjithashtu ka shkruar tregime të shkurtra me kujtime nga koha në burg.

Na ndiqni

1,210FansLike
252FollowersFollow
115FollowersFollow

Të tjera

Të ngjashme